رد الفنان محمد عطية على تساؤلات الجمهور وكشف عن اسرار هذا التحول في شكله والجسم المثالي الذي وصل اليه.
عطية رد على هذه التعليقات لأول مرة وقال: "الفترة اللي فاتت أكتر من صفحة لقيتهم منزلين صوري وكاتبين عن التغيير اللي حصل في شكل جسمي.. أكتر تعليق الناس كاتبينه.. إن الفلوس بتعمل كل حاجة".
وأضاف "هفترض معاك إنه فلوس.. رغم ان فيه ناس كتير معاهم فلوس ومابيعملوش كده.. بس اللي كاتب كده مش عارف إني بتمرن مرتين في اليوم ، 6 أيام كل أسبوع ، بصحي الصبح ألعب كارديو 45 دقيقة عالريق وباليل بأتمرن ساعتين أوزان و 45 دقيقة تانية كاريدو"
واستكمل "يعني بتمرن في اليوم 3 ساعات و نص، ده غير إني حارم نفسي من كل سكر والدهون والزيوت والمحاشي وخلافه، وباكل بالجرام وبيعدي عليا أيام كتير زيرو كارب مابيدخلش في بقي غير بروتين و بس".
وتابع: "كل عزومات رمضان كنت بروح متفرج.. أصحابي بيكونوا عندي بيطلبوا بيتزا و..، وأنا قاعد باكل خيار وصدور فراخ من غير أي حاجة عليها".
واضاف:" أنا فاكر كويس إن أول يوم زيرو كارب وأنا راجع من التمرين كنت هعمل حادثة أكتر من مرة وركنت العربية خمس مرات عشان عنيا مزغللة ومش قادر أسوق، ده غير بقى أن المدرب بتاعي اللي وصلني للشكل ده مش بيرحم و تمرينته تقيلة جدا".
ثم تابع حديثه: "صاحبتي كانت دايما بتتخانق معايا بسبب إن مش عارفة تخرج معايا بسبب إلتزامي بمواعيد الجيم، يعني حارم نفسي من حاجات كتير جدا عشان أوصل للشكل ده".
واختتم عطية تعليقه وكتب" الغريب بقى أن لو دخلت على صفحة منزلة تغيير في جسم أي فنان برة هتلاقي كل التعليقات (يا سلام على الارادة ، شوف الإصرار) ، ما اعرفش المتلازمة دي إسمها إيه الصراحة ، من الأخر لو أنت مقتنع أن الموضوع فلوس يبقى عمرك ما هتعمل حاجة"
